O alcalde de Abegondo, José Antonio Santiso, prestará declaración a próxima semana no Xulgado de Instrución de Betanzos sobre as inxurias e calumnias das que lle acusa o portavoz da Agrupación Progresista de Abegondo, Juan José Rocha, que tamén dará o seu testemuño ante o xuíz.

O ex rexedor abegonés, que estará asistido polo letrado Jorge Vázquez, do despacho de Víctor Espiñenta, denunciou a Santiso por realizar desde o mes de marzo de 2009 varias declaracións nas que lle atribuía a realización de "prácticas delituosas e irregularidades gravísimas". Rocha esixe ao alcalde de Abegondo que o indemnice polos danos morais e materiais que di que lle ocasionaron as súas palabras. Os feitos, segundo o denunciante, están agravados porque as declaracións de Santiso foron publicadas en numerosos medios de comunicación.

O rexedor non se presentou a un acto de conciliación ao que fora convocado para evitar que a querela presentada polo portavoz da Agrupación Progresista chegase aos tribunais. Santiso asegurou entón que lle gustaría que a causa chegase aos xulgados para demostrar a súa inocencia